Катынова, Людмила Константиновна
| Людмила Константиновна Катынова | |
|---|---|
Катынова, Людмила Константиновна, кыс ӧбӧкӧзи Иртакова, (1956 јыл кочкор айдыҥ 6-чы кӱни, Јалаҥай јурт, Кан-Оозы аймак Алтай Республика) — ӱредӱчи, ГАГПИ-ни 1980 јылда тӱгезип, алтай тил ле литератураныҥ ӱредӱчизи деп специальность алган. 37 јылдыҥ туркунына Кан-Оозы ла Кӧксу-Оозы аймактардыҥ школдорында иштеген. Сӧӧги кергил. Алтай Республиканыҥ нерелӱ ишчизи (2004).
Биографиязы
Јаш тужы
1956 јылдыҥ, кочкор айыныҥ 6-чы кӱнинде, колхозчылардыҥ билезинде чыккан. Адазы, Константин Аламчинович, 14 јаштаҥ ала койчы болуп иштеген. Ак-чек ижи учун ВДНХ-да тушкан, ары укту малдар апарган. Кӧп катап Алтайский кырайдыҥ депутады болгон. Энези, Анна Юдиновна, кой-мал кичееп иштеген. Олор экӱ эптӱ-јӧптӱ јуртагылап, 4 бала чыдаткылаган. Ончо балдарына ӱредӱ берип, јӱрӱмниҥ јаан јолына чыгарган.
Людмила 1974 јылда областной национальный школды (эмдиги Плакастыҥ гимназязы) божодып, ГАГПИ-ниҥ тӱӱки-филологиялык факультединде ӱренген (1975—1980).
Билези
1978 јыл јылда Катынов Виктор Ивановичле биле тӧзӧгӧн. Олор экӱ 5 бала чыдаткандар — 2 кызычак ла 3 уул. Јаан кызы, Айас, экономика ла ӧзӱмниҥ министерствозында иштейт. Ол Алтай Республиканыҥ нерелӱ экономизи. Экинчи кызы, Айана, эмчи-терапевт. Јаан уулы, Ермак, следователь. 2022 јылда Россия Федерацияныҥ эҥ артык следователи деп ат адаткан. Эмдиги ӧйдӧ амыралтада. Ортон уулы, Аржан, тургуза ӧйдӧ СВО-до, кичӱ уулы, Айдар, бийик категориялу мала аштыҥ эмчизи (ветеринарный врач). Людмила Константиновна ла Виктор Иванович 11 баркыныҥ (внуки) сӱӱген карганактары болгылайт.
Ижи-тожы
Ӱедӱчиниҥ ижин 1980 јыл јылда Кӧксу-Оозы аймагыныҥ Чендектеги орто ӱредӱлӱ школында орус тилдиҥ ӱредӱчизи болуп баштаган.Мында 5 јылдыҥ туркунына иштеген.Оноҥ 5 јыл ӧйгӧ Кан-Оозы аймагыныҥ Јалаҥайдагы орто ӱредӱлӱ школында баштамы класстардыҥ ӱредӱчизи болгон. 1990 јыл јылдаҥ ала амыралтага чыгар ӧйгӧ јетире Кӧксу-Оозы аймагыныҥ Кастактуныҥ толо эмес орто ӱредӱлӱ школында алтай тилдиҥ ӱредучизи. Школдо иштеп тура, аймактагы алтай тилдиҥ ӱредӱчилериниҥ методбиригӱзин башкарган. "Лидер в образовании" деп аймак кеминде ӧткӱрилген конкурста "Бала, ада-эне ле ӱредӱчи ортодо ӱредӱ процесстеги колбуларды тӧзӧӧри"деп темала турушкан, "Алтай тилдиҥ эҥ артык ӱредӱчизи" деп республика кеминде конкурстыҥ туружаачызы."Школдо алтай ла орус тилдерди тӱҥдештирер методика ажыра ӱредери" деп темалу ижиле турушкан.
Кайралдары
- 2004 јылда "Алтай Республиканыҥ нерелӱ ишчизи" деп ат адаткан
- Алтай Республиканыҥ Ӱредӱлик министерствозыныҥ кӱндӱлӱ грамоталары
- Кӧксу-Оозы аймак муниципал тӧзомӧлиниҥ кӱндӱлӱ грамоталары ла Быйанду самаралары